فات شهرين بس على وفاة أخويا “سيد”… شهرين والتربة لسه مندية، وريحة الفراق لسه واقفة في زورنا زي اللقمة الناشفة. سيد كان هو السند والظهر، ومو.ته حتّتنا كلنا، بس الظاهر إن مو.ته فتح طاقة جهنم اللي كانت مستخبية تحت الرماد. أنا “سمر”، طول عمري ماشية جنب الحيط وبقول “يا رب السلَم”. اتجوزت “عصام” من خمس سنين، راجل على قد حاله بس كنت شايفاه دنيا. بس كانت فيه عقربة ساكنة في نفس البيت… “عبير”، مرات أخويا سيد الله يرحمه.
عبير دي من يوم ما دخلت عيلتنا وهي عينيها مني. كان عندها غل مش مفهوم، تبص لطقمي، لضحكتي، ولأي كلمة حلوة عصام يقولهالي. ومن سنة تقريباً، جاتلي وقالتلي بصوت وطي وسوسة: – “سمر.. عايزاكي في خدمة سر، محتاجة خمسين ألف جنيه أفك بيهم زنقة ومن غير ما سيد أو عصام يعرفوا.” رديت عليها بنية صافية ورفضت: – “يا عبير أنتِ أختي، بس أنا أيدي مش فرطة، وما أقدرش أتصرف في مليم واحد من غير علم جوزي عصام.. الراجل يزعل مني، وأنا ما أقدرش أكسر كلامه.”
يومها عينيها برقت، ووشها أصفر، وقالتلي جملة فضلت ترن في ودني لحد النهاردة: – “بقى كدة؟ ماشي يا سمر.. خايفة على زعل عصام؟ بكرة أخليه يتصرف هو بكلمتي أنا، وأخليكي تبكي بدل الدموع دم!” افتكرتها ساعة غضب وراحت لحالها.. لحد ما سيد مات. في فترة العدة، عبير كانت تمثل الدور صح. طرحة سودة نازلة لحد عينيها، ودموع على الخدين، وصوت واطي ومكسور. بس أنا قلبي ما كانش مرتاح.. عصام جوزي بدأ يتغير. يمسك التليفون ويسرح، يبتسم للشاشة، ويمشي في الصالة يهمس، ولما أقرب منه يقلب التليفون على وشه بسرعة ومشيته تبقى متوترة.
وفي ليلة.. كانت الساعة داخلة على تلاتة بعد نص الليل. عصام كان نايم نوم تقيل وتليفونه كان جنبه على الكومودينو. التليفون نور بنغمة إشعار واطية جداً. سحبت التليفون بشويش، وحطيت الباسورد اللي كنت حافظاه. فتحت الشات.. وكانت الصدمة اللي شلت طرافي! شات طويل عريض بينه وبين “عبير” مرات أخويا اللي لسه في عدتها! رسائل توجع القلب.. كلام حب وغزل رخيص، وعبير كاتباله: – “أنا مستنية الثلاث شهور وعشر أيام يخلصوا بفارغ الصبر يا عصام.. المأذون جاهز؟ عايزة أشوف كسرة عين سمر وهي شايفاني هبقى ضرتها وفي بيتها.. عشان تعرف لما أطلب منها حاجة وما تدينيش يبقى شكلها إيه.”
وعصام رد عليها: – “هانت يا ملكة قلبي.. العدة تخلص بس، وأول ما تطلع هكتب عليكي وهجيبك تحت رجليها، وأنا اللي هكسر عينها عشانك.” الدنيا دارت بيّا. حست بإن حيطة البيت كلها وقعت فوق دماغي. مسكت تليفوني بسرعة ورعب، وصورت الشات كله صورة صورة، فيديو وفوتو، وبعت كل حاجة على تليفوني. أيدي كانت بترتعش ودموعي نازلة بس من غير صوت.. صوتي كان محبوس جوة صدري من كتر القهرة. لميت هدومي في شنطة سريعة، وأخدت صيغتي، ومسكت التليفون بالدليل الملموس.. ونزلت في ضلمة الليل، وطلعت على بيت أبويا.
أبويا لما فتح الباب وشافني بالمنظر ده، اتخض. رميت نفسي في ح.ضنه وعيطت بكا يهد الجبال. ولما حكيتله وفرجته على صور الشات، الراجل كبر عشر سنين في ثانية. شهق شهقة وشهق بالدم. أبويا مسك تليفونه، وبصوت هز أركان الشقة قال: – “اتصلي بكبارات عيلتها، وجمعيلي إخواتها وأبوها دلوقتي.. الليلة دي مش هتعدي، والست لازم تتفضح في وسط الناس كلها!” ساعة واحدة وكانت الصالة في بيت أبويا مليانة بـ أهل عبير، وأبوها وإخواتها قاعدين ومصطومين، وعصام جوزي جه يظيط ويصرخ يدور عليّ.. لحد ما دخل الشقة وشاف القعدة والموقف!
عبير جات مع أبوها وهي لابسة الأسود وتمثل المسكنة.. وبصتلي بابتسامة خبيثة كأنها بتقولي “أنا كسبت”. أبويا وقف في نص الصالة، وصوته كان زي الرعد، وبص لـ عصام وعبير وقال: – “منورين يا عرسان!.. ارفعوا وشكم وشوفوا قلة أصلكم وفجركم مكتوب ومصوَّر إزاي!” رمى أبويا التليفون في وش أبو عبير وإخواتها… وهنا كانت البداية، بداية الحرب! أبو عبير مسك التليفون وإيده بترتعش، وعينيه بتتأنقل بين السطور والرسائل.. الصمت في الصالة كان يخنق. إخوات عبير الكبار قربوا من أبوهم وشرعوا يبصوا في الشاشة، وفجأة وشوشهم اتغيرت لقطعة من الفحم، والدم هرب من عروقهم.
أبو عبير بص لبنته بنظرة كسرة وقرف، وهز رأسه وهو مش مصدق: – “دي تربيتي ليكي يا عبير؟ أخو جوزك؟ وجوزك لسه في عدته ما كملش شهرين تحت التراب؟ كدة تطعني ابن عمك وسندك في ظهره وهو ميت؟” عبير وشها اتخ.طف، والمسكنة طارت في ثانية لما شافت الدليل قدام أهلها. بس الغل اللي في قلبها كان أكبر من الخجل، وقفت وبصتلي بعينين مليانة سم وقالت بصوت متبجح:
– “أيوا! عملت كدة! وبنتك هي السبب! بنتك استخسرت فيا القرشين لما جيت أطلبهم منها، وقالتلي جوزي وكرامتي! أهو جوزها اللي كانت خايفة على زعله جه تحت رجلي، وهو اللي طلبني وهو اللي قالي هجيبك ضرة ليها وكسرة لعينها!” في اللحظة دي، عصام جوزي وقف في نص الصالة، وشه رايح جاي من الخوف والارتباك. حاول يلعب دور المظلوم ويبعد التهمة عن نفسه، وقال وهو بيبص لأبويا وبيعلي صوته:
