خطيب بنتي بييجي بيتنا ياكل ديلفري وأنا عاملاله بط ومحاشي وفراخ وحلويات بأكتر من ألف جنيه، ولما طلبت من بنتي إنه يحاسب على الأكل اللي بيطلبه من بره، قالتلي كلمة وجعت قلبي وخلتني أحس إني غريبة في بيتي! لكن اللي حصل بعد كده يوم ما خطيبها جه، قلب الموضوع كله على دماغنا! 😱💔
أنا أم بنت مخطوبة بقالها سنة، ومن يوم ما اتخطبت وأنا بعتبر خطيبها واحد من ولادي، والله العظيم ما عمري حسسته إنه غريب عن البيت، ولا في يوم قصرت معاه في واجب أو استقبال.
أبو بنتي مسافر، وطالع عينه في الغربة علشان يوفر لنا حياة كويسة، وأنا ست بيت وبحب الأصول والواجب، ومتربية إن الضيف لما يدخل بيتي لازم أكرمه وأحطّه فوق راسي.
علشان كده، كل ما خطيب بنتي يتصل ويقول إنه جاي، أقوم أجهز نفسي من بدري، وأدخل المطبخ بالساعات.
أعمل بط، وفراخ، ومحاشي، ولحمة، وأصناف كتير، وأفضل ألف بين البوتاجاز والفرن لحد ما ضهري يوجعني، وكل ده وأنا مبسوطة، لأن في الآخر هقول لنفسي: دي فرحة بنتي، وربنا يتمم لها على خير.
وحتى الحلويات اللي مش بعملها كل يوم، بقيت أعملها مخصوص في اليوم اللي بييجي فيه خطيبها.
والحقيقة إني معروفة وسط قرايبي إن أكلي حلو، والناس لما تيجي عندي بتاكل وتشكر ربنا، وعمر ما حد دخل بيتي وطلع زعلان من أكلي.
لكن المصيبة إن خطيب بنتي كان كل ما ييجي، وبعد ما أقعد أحط الأكل على السفرة وأنده على الكل، ألاقيه بكل بساطة ماسك تليفونه وبيقول:
“إيه رأيك يا حبيبتي نطلب أكل من بره النهارده؟ أنا نفسي في بيتزا أو فراخ بروستد.”
في الأول كنت بضحك وأقول له:
“يا ابني ما الأكل موجود أهو، وأنا عاملالكم اللي نفسكم فيه، دوق بس وقولي رأيك.”
يرد عليا وهو بيبص في الموبايل:
“تسلم إيدك يا طنط، بس أنا بصراحة نفسي في أكل المطاعم.”
كنت بقول لنفسي معلش، يمكن نفسه في حاجة معينة، ويمكن دي مرة وعدت.
لكن اللي وجعني إن الموضوع بقى عادة!
أكون عاملة بط ومحاشي وفراخ، ألاقيه طالب وجبة من بره، وأوقات يطلب أصناف تانية لبنتي، ويقعدوا ياكلوا اللي جاي من المطعم، والأكل اللي أنا تعبت فيه يفضل زي ما هو!
طب وأنا أعمل إيه بالأكل ده كله؟ أرميه؟ ولا أحوشه في التلاجة؟ ولا أوزعه على أيام الأسبوع؟
والمشكلة إن الطلبات دي مش ببلاش، وأقل مرة ممكن تتكلف أكتر من ألف جنيه، وأنا أصلًا مش بخليه يدفع جنيه واحد، لأن في عُرفنا العريس لما ييجي بيت خطيبته، أهل البيت هما اللي بيكرموه.
لكن هو كده بيخليني أدفع تمن الأكل اللي عملته، وفوقه تمن الديلفري، من غير ما يكون في أي تقدير للتعب أو للمصاريف!
ومش هكدب عليكم، أنا مش زعلانة على الأكل قد ما أنا زعلانة من الإحساس اللي بيوصل لي.
يعني أنا أقف في المطبخ بالساعات علشان أفرحك، وفي الآخر تسيب كل ده وتطلب أكل من بره قدامي؟!
طب ما تقول لي من الأول إنك مش بتحب أكلي، وأنا أريح نفسي وأعمل صنف واحد وخلاص!
الأغرب إن أم خطيب بنتي كانت بتكلمني مرة، وقلت لها بهزار:
“يا أختي ابنك ده كل ما ييجي عندنا يطلب أكل من بره، هو مش بيحب أكل البيت ولا إيه؟”
ضحكت وقالت لي:
“غريبة والله! ده ابني عندي بياكل كل حاجة، وبيحب الأكل البيتي جدًا!”
ساعتها سكت، وقلت يمكن الولد بيحب يدلع خطيبته، أو بيحب يغير جو، ومش عايزة أظلــ,,ـــــمه.
لكن مع تكرار الموضوع بدأت أحس إني مش قادرة أكمل بنفس الطريقة.
لحد ما جه يوم كنت عاملة فيه محشي وبط وفراخ وصينية رقاق، وتعبانة جدًا، وكنت مستنية بنتي وخطيبها علشان نتغدى كلنا سوا.
وأول ما وصلوا، وبعد السلام والترحيب، لقيته قاعد على الكنبة فاتح تطبيق الأكل، وبكل هدوء بيقول لبنتي:
“اطلبي لنا حاجة ناكلها، أنا مش عايز أكل بيتي النهارده.”
والله العظيم حسيت إن حد كبّ عليا مية ساقعة!
بصيت للسفرة اللي مجهزاها من الصبح، وبصيت لبنتي اللي مسكت الموبايل وبدأت تختار الطلب، وقررت المرة دي إني ما أسكتش.
قلت لها بهدوء:
“يا بنتي، هو إحنا كل مرة هنعمل أكل ونطلب أكل من بره؟
أنا مش قادرة على المصاريف دي، وأبوكي مسافر وبيشقى علشان الفلوس دي، وأنا مش هفضل أدفع في أكل محدش بياكل منه.”
بنتي بصت لي بضيق وقالت:
“يعني يا ماما هتحسسيه إنه تقيل علينا؟!”
قلت لها:
“أنا ما قلتش إنه تقيل علينا، ده أنا بعمل له أكل مخصوص، لكن مش معقول أصرف أكتر من ألف جنيه على أكل البيت، وفوقهم ألف جنيه ديلفري كل مرة! هو ياكل من الأكل اللي موجود، أو لو نفسه في حاجة معينة يطلبها على حسابه هو، أو ما يطلبش خالص طول ما هو عندنا.”
لقيتها اتعصبت وقالت لي:
